மலையகத்தில் தொடர்ச்சியான மழை காரணமாக சில வீதிகளில் மண்சரிவு ஏற்பட்டு போக்குவரத்தும்பாதிப்புக்குள்ளாகியுள்ளன.
நோட்டன் கொழும்பு, ஹட்டன் கொழும்பு, ஹட்டன் நுவரெலியா ஆகிய பிரதான வீதிகளில் பல இடங்களில் மண்திட்டுகள் சரிந்து வீழ்ந்துள்ளன. ஒரு சில இடங்களில் மண்திட்டு சரிவின் காரணமாக ஒரு வழிபோக்குவரத்தே மேற்கொள்ளப்பட்டு வருகின்றன.
ஆங்காங்கே மண்சரிவுகள் ஏற்படுவதனால் வாகன சாரதிகள் அவதானத்துடன் வாகனங்களை செலுத்துமாறு பொலிஸார் வேண்டுகோள் விடுத்துள்ளனர்.
அதிகாலை 4 மணியளவில் ஹட்டன் ஸ்டிரதன் தோட்டத்தில் ஏற்பட்ட மண்சரிவினால் ஒரு வீட்டில் பகுதியளவு சேதமாகியுள்ளது. எனினும் குடியிருப்பாளர்களுக்கு எவ்வித பாதிப்புகளும் இல்லை எனவும், பாதிக்கப்பட்டவர்கள் அயலவர்களின் வீட்டில் தங்க வைப்பதற்கான ஏற்பாடுகள் செய்யப்பட்டுள்ளதாகவும் தெரிவிக்கப்படுகின்றது.
அத்தோடு பதுளை கொழும்பு புகையிரத பாதையில் ஹட்டன் மல்லியப்பு பகுதியில் சிறிய மண்சரிவு ஏற்பட்டதனால் காலை நாவலப்பிட்டியிலிருந்து நானுஓயா வரை செல்லவிருந்த புகையிரதம் சற்றுதாமதமாகியே சென்றுள்ளது.
நீரேந்து பிரதேசங்களில் கடந்த 24 மணித்தியாலகளில் தொடர்ச்சியாக மழை பெய்து வருவதனால் லக்ஸபான, நவலக்ஸபான, காசல்ரி, மவுசாகலை, கெனியோன், விமலசுரேந்திர மேல் கொத்மலை, ஆகிய பிரதான நீர்தேக்கங்களின் நீர் மட்டம் சடுதியாக உயர்ந்து வருகிறது.
அதிக மழை வீழ்ச்சி காரணமாக மலையகததின் பல பகுதிகளில் மண்சரிவு அபாயமும் ஏற்பட்டுள்ளன. இதனால் மலைகளுக்கும், மண்திட்டுக்கும் அருகாமையில் வசிப்பவர்கள் அவதானமாக இருக்குமாறு இடர்முகாமைத்துவ மத்திய நிலையம் பொது மக்களிடம் கேட்டுக்கொண்டுள்ளது.
தொடர்மழை காரணமாக மலையக பாடசாலைகளின் மாணவர்களின் வரவும் இன்றைய தினம் மிககுறைவாகவே காணப்பட்டன. இதனால் கற்றல் கற்பித்தல் நடவடிக்கைகள் பாதிப்புக்குள்ளாகியிருந்தன.
நகரங்களுக்கு பொது மக்களின் வருகை மழை காரணமாக குறைவாக காணப்பட்டதனால் வரத்தக நடவடிக்கைகளும் பாரிய அளவில் வீழ்ச்சி கண்டுள்ளதாக வர்த்தகர்கள் தெரிவிக்கின்றனர்.
பல இடங்களில் வெள்ள நீர் விவசாய நிலங்கள் மீது பாய்ந்துள்ளதனால் விவசாய காணிகளும் பாதிப்புக்குள்ளாகியுள்ளன.
தொடர் மழை காரணமாக தோட்டத்தொழிலாளர்கள் மிக குறைவா வேலைக்கு சமுகமளித்துள்ளமையினால் தேயிலை உற்பத்தி பாதிப்புக்குள்ளாகியுள்ளதாக தோட்ட நிர்வாகங்கள் தெரிவிக்கின்றன.
