கொழும்பு நுகர்வோர் விலைச்சுட்டெண் பிரகாரம் மதிப்பிடப்படும் பணவீக்கமானது தொடர்ந்து நான்காவது மாதமாக டிசம்பரிலும் 1.7 சதவீத பணச்சுருக்கத்தினைப் பதிவுசெய்துள்ளது.
அதன்படி கடந்த நவம்பர் மாதம் 0.6 சதவீதமாகப் பதிவான உணவுப்பணவீக்கம், டிசம்பரில் 0.8 சதவீதம் கொண்ட சிறிதளவான அதிகரிப்பைப் பதிவுசெய்ததுடன், நவம்பர் மாதம் 3.3 சதவீதமாகக் காணப்பட்ட உணவல்லாப்பணச்சுருக்கம் டிசம்பரில் 3.0 சதவீதமாக மிதமடைந்தது.
அதேவேளை கொழும்பு நுகர்வோர் விலைச்சுட்டெணின் மாதாந்த மாற்றமானது டிசம்பரில் சதவீதமாக வீழ்ச்சியடைந்துள்ளது.
இதற்கு உணவுப்பொருட்களின் விலைகளில் அவதானிக்கப்பட்ட 1.24 சதவீத அதிகரிப்பு மற்றும் உணவல்லாப்பொருட்கள், சேவைகளின் விலைகள், கட்டணங்களில் முறையே அவதானிக்கப்பட்ட 0.06 சதவீத வீழ்ச்சி என்பன காரணமாக அமைந்துள்ளன.
பொருளாதாரத்தின் அடிப்படைப்பணவீக்கத்தைப் பிரதிபலிக்கின்ற மையப்பணவீக்கம் கடந்த நவம்பர் மாதத்தைப் போன்று டிசம்பர் மாதத்திலும் 2.7 சதவீதமாக மாற்றமின்றிக் காணப்பட்டது.
இது இவ்வாறிருக்க பொருத்தமான கொள்கை வழிமுறைகள் மற்றும் உறுதியான பணவீக்க எதிர்பார்க்கைகள் என்பவற்றின் மூலம் துணையளிக்கப்பட்டு, தற்போதைய பணச்சுருக்கமானது எதிர்வரும் காலத்தில் சீரடைந்து, நடுத்தர காலத்தில் இலக்கிடப்பட்டவாறு 5 சதவீத மட்டத்தில் பதிவாகும் என மத்திய வங்கி எதிர்பார்ப்பு வெளியிட்டுள்ளது.
