பூட்டான் குட்டி இளவரசரின் முதலாவது பிறந்தநாளையொட்டி மனதை கொள்ளை கொள்ளும் புதிய புகைப்படம் மற்றும் காலண்டர் வெளியிடப்பட்டுள்ளன.
இந்தியாவுக்கும் சீனாவுக்கும் இடையேயான மலைகளுக்கு நடுவில் அமைந்துள்ள குட்டி நாடு பூட்டான். அரசர் ஜிக்மே கெசார் நம்கெய்ல் வாங்சக் (வயது 36) பூட்டானை ஆட்சி செய்து வருகிறார். உலகிலேயே இளம்வயது அரசர்களில் இவரும் ஒருவர். ராணி பெயர் ஜெட்சன் பெமா (வயது 25). இந்த அரச தம்பதியருக்கு கடந்த ஆண்டு பிப்ரவரி 5-ம் தேதி ஆண் குழந்தை பிறந்தது. குட்டி இளவரசன் பிறப்பு மிகவும் உற்சாகமாக கொண்டாடப்பட்டது.
பூட்டான் மன்னர்களை டிராகன் அரசர்கள் என்றும், ராணிகளை டிராகன் ராணிகள் என்றும் அழைக்கப்படுகிறார்கள். எனவே, இளவரசன் டிராகன் இளவரசன் என அழைக்கப்படுகிறார். இந்த குட்டி டிராகன் இளவரசனின் முதலாவது பிறந்த நாள் நாளை கோலாகலமாக கொண்டாடப்படுகிறது.
இதையொட்டி, ஊடகங்களுக்கான பூட்டானின் அரண்மனை, தேர்ந்தெடுத்த புகைப்படங்களை வெளியிட்டுள்ளது. இந்த புகைப்படங்களுடன் கூடிய பிரத்யேக காலண்டரும் வெளியாகி உள்ளது. இந்த புகைப்படங்கள் மற்றும் புகைப்படங்களுடன் கூடிய காலண்டரை வெளியிட்டுள்ள யெல்லோ இணைய தளம், இந்த பிரத்யேக காலண்டர் புகைப்படங்கள் பதிவிறக்கம் செய்வது இலவசம் என்றும், இது பலருடைய இதயங்களை உருக வைக்கும் என்றும் கூறியுள்ளது.
பாரம்பரிய அரச குடும்பத்தின் மஞ்சள் நிற அங்கியை அணிந்து குட்டி டிராகன் இளவரசன், தன் பிஞ்சுக் கையில் கார் பொம்மையுடன் புன்னகையுடன் போஸ் கொடுக்கும் படம் இணையத்தில் வைரலாக பரவி வருகிறது.
இதுதவிர பெற்றோருடன் அரண்மனையில் எடுக்கப்பட்ட பிரத்யேக புகைப்படங்களும் வெளியிடப்பட்டுள்ளன.
