இலங்கை மத்திய வங்கியின் ஆளுநராக பிரதி ஆளுநர் பதவி வகிக்கும் கலாநிதி நந்தலால் வீரசிங்க நியமிக்கப்படலாம் எனத் தெரியவருகிறது. அதேவேளை மத்திய வங்கி ஆளுநர் அர்ஜுன மகேந்திரன் இலங்கைக்கான பிரிட்டன் உயர்ஸ்தானிகராக நியமிக்கப்படலாம் என்றும் தெரியவருகிறது.
மத்திய வங்கி ஆளுநர் அர்ஜுன மகேந்திரனின் பதவிக் காலம்நேற்று 30 திகதியுடன் முடிவவடைந்த நிலையில் அவருக்கு பதவி நீடிப்பு வழங்க வேண்டாமென ஜே.வி.பி. பொது எதிர்க்கட்சி தரப்பினரும் மற்றும் அரசில் அங்கம் வகிக்கும் சுதந்திரக் கட்சியினை சார்ந்த பல அமைச்சர்களும் தமது கடுமையான எதிர்ப்பை கடந்த காலங்களில் வெளியிட்டு வந்தனர்.
மத்திய வங்கி ஆளுநரை வெளியேற்ற வேண்டும் என கொழும்பில் பாரிய ஆர்ப்பாட்டத்தையும் பொது எதிர்கட்சியினர் நடத்தினர்.இவ்வாறு நாட்டுக்குள் மத்திய வங்கி ஆளுநர் அர்ஜுன் மகேந்திரனுக்கு எதிரான விவாதங்கள், விமர்சனங்கள் தலைதூக்கிய நிலையில் 29 ஆம் திகதி புதன்கிழமை கிராந்துரு கோட்டையில் இடம்பெற்ற நிகழ்வொன்றில் உரையாற்றிய ஜனாதிபதி மைத்திரிபால சிறிசேன மத்திய வங்கி ஆளுநராக புதியவர் ஒருவர் நியமிக்கப்படுவார் எனத் தெரிவித்தார்.
அன்றைய தினமே மாலை ஜனாதிபதி மைத்திரிபால சிறிசேனவும் பிரதமர் ரணில் விக்கிரமசிங்கவும் மத்திய வங்கி வளாகத்திற்கு விஜயம் செய்து மத்திய வங்கி மற்றும் நாட்டின் பொருளாதார நிலைமைகள் தொடர்பாக பிரதி ஆளுநர்களுடன் கலந்துரையாடல்களை நடத்தினார்கள். இதன்போது அர்ஜுன் மகேந்திரனும் கலந்து கொண்டார்.
இவ்வாறு மத்திய வங்கி ஆளுநர் நியமனம் தொடர்பில் இழுபறி நிலை தலைதூக்கியிருந்த சந்தர்ப்பத்திலேயே மத்திய வங்கியின் பிரதி ஆளுநராக பதவி வகிக்கும் நந்தலால் வீரசிங்க மத்திய வங்கியின் புதிய ஆளுநராக நியமிக்கப்படலாம் எனத் தெரியவருகிறது.
