சஜித் பிரேமதாசவை வெற்றி பெற செய்வதற்காக ஐக்கிய தேசியக் கட்சியினர் அனைவரும் பெரும் அர்ப்பணிப்புடன் செயற்பட்டு வருகின்றனர். 1988ஆம் ஆண்டுக்குப் பின்னர் ஐக்கிய தேசியக் கட்சிக்கு கிடைக்காத அரச தலைமைத்துவத்தை சஜித் பிரேமதாச இம்முறை ஜனாதிபதித் தேர்தலில் வெற்றிகொள்வதன் ஊடாக மீளப் பெற்றுக்கொள்ள முடியும் என ஐக்கிய தேசியக் கட்சியின் பொதுச்செயலாளர், கல்வி அமைச்சர் அகில விராஜ் காரியவசம் தெரிவித்தார்.
ஜனாதிபதித் தேர்தலை முன்னிட்டு நேற்று திங்கட்கிழமை குளியாபிட்டிய தேர்தல் தொகுதியில் நடைபெற்ற பிரசாரக் கூட்டத் தில் கலந்து கொண்டு உரையாற்றும் போதே அமைச்சர் மேற்கண்டவாறு தெரிவித்தார்.
அங்கு அமைச்சர் மேலும் உரையாற்றுகை யில்,
ஜனாதிபதித் தேர்தலில் சஜித் பிரேமதாசவை வெற்றி பெறச் செய்வதற்காக ஐக்கிய தேசியக் கட்சியினர் அனைவரும் பெரும் அர்ப்பணிப்புடன் செயற்பட்டு வருகின்றனர். ஜனாதிபதித் தேர்தலில் வெற்றி அடைந்தால் ஜனாதிபதி, பிரதமர், அமைச்சரவைக்கான அமைச்சுப் பதவிகள் ஐக்கிய தேசியக் கட்சி தலைமையிலான ஐக்கிய தேசிய முன்னணிக்குக் கிடைக்கும்.
ஐக்கிய தேசியக் கட்சியில் காணப்பட்ட கருத்து முரண்பாடுகள் முடிவுக்குக் கொண்டு வரப்பட்டு அமைச்சர் சஜித் பிரேமதாசவை ஜனாதிபதி வேட்பாளராக நியமிக்கப்பட்ட பின்னர் அவரது வெற்றிக்காக அனைவரும் பூரண ஒத்துழைப்புடன் செயற்பட்டு வருகின்றனர். ஜனாதிபதித் தேர்தல் வெற்றியின் பின்னர் அடுத்த ஐந்து வருட அபிவிருத்தி நடவடிக்கைகளை வேகமாகவும் வெற்றிகரமாகவும் முன்னெடுப்பதுடன் தற்போதுள்ள சுதந்திரமான சூழலை மீளவும் பெற்றுக்கொள்ள முடியும்.
ஜனாதிபதித் தேர்தலுக்கான வெற்றிக்காக கட்சி, பேதங்கள் பாராமல் கட்சிகள் மற்றும் சிவில் அமைப்புகள் 47 அன்னம் சின்னம் ஆதரவு வழங்க ஒப்பந்தங்கள் கைச்சாத்திட்டன. எனினும் ராஜபக் ஷ குடும்பத்தினரை ஆட்சிக்குக் கொண்டு வந்து அவர்களது தேவைகளை நிறைவேற்றுவதற்கு எதிரான அனைத்து முற்போக்கு சிந்தனை கொண்டவர்களும் ஒன்றிணைய வேண்டும்.
2015 ஆம் ஆண்டு எமது அரசாங்கத்தை நிறுவினாலும் எமக்கென்று ஜனாதிபதி ஒருவர் இருக்கவில்லை. அன்னம் சின்னத்தில் வெற்றி பெற்று பக்கச்சார்பு இல்லாத ஜனாதிபதியாக இருப்பதாக மைத்திரிபால சிறிசேன கூறினாலும் அவர் அவ்வாறு செயற்படவில்லை. நாம் பல்வேறு இடை யூறுகள் மத்தியில் அபிவிருத்திப் பணிகளை முன்னெடுத்துச் சென்றோம். எனவே கட்சி பேதங்கள் பராமல் சஜித் பிரேமதாசவை வெற்றி பெறச் செய்வதற்கு அனைவரும் ஒத்துழைக்க வேண்டும் என்றார்.
