வடக்கு மாகாணத்தில் தீர்க்கமுடியாத பல பிரச்சினைகள் உள்ளபோது, வடக்கு மாகாண ஆளுநர் பௌத்த மாநாட்டினை நடத்தியதை ஏற்றுக்கொள்ள முடியாது என வடக்கு மாகாண சபையின் முன்னாள் எதிர்க்கட்சித் தலைவர் வி.தவராசா தெரிவித்துள்ளார்.
யாழ்ப்பாணத்தில் இன்று இடம்பெற்ற ஊடகவியலாளர் சந்திப்பின்போதே அவர் இதனை தெரிவித்துள்ளார்.
இதன்போது மேலும் தெரிவித்த அவர், “வடக்கு மாகாணசபை இயங்கிய ஐந்து வருட காலப்பகுதிக்குள் மக்களின் பிரச்சினைகள் தீர்வுகாண முடியாத அளவுக்கு தீர்க்கப்படாமல் இருக்கின்றது.
எனினும் வடக்கு மாகாணத்திற்கு புதிதாக தமிழ் ஆளுநர் ஒருவர் நியமிக்கப்பட்டதையடுத்து நாம் மிகவும் மகிழ்ச்சி அடைந்தோம். அவர் வடக்கு மாகாண சபையினால் நிறைவேற்றப்படாதவற்றை நிறைவு செய்வார் என பெரிதும் எதிர்பார்த்தோம்.
எனினும் அவர் பதவியேற்றதன் பின்னர் பௌத்த மாநாட்டுக்கு முன்னுரிமை அளித்த விடயமானது எமக்கு வருத்தத்தை அளிப்பதோடு இந்த விடயம் தொடர்பாக எனது கண்டனத்தையும் தெரிவித்துக்கொள்கிறேன்” என மேலும் அவர் குறிப்பிட்டுள்ளார்.
