நாட்டின் பல பிரதேசங்களின் எரிபொருள் நிரப்பும் நிலையங்களுக்கு அருகாமையில், பொதுமக்கள் நீண்ட வரிசையில் இன்றும் காத்திருப்பதை அவதானிக்க கூடியதாக உள்ளது.
நேற்றும், இன்றும் 4 ஆயிரத்து 800 மெற்றிக் தொன் பெற்றோலை நாடளாவிய ரீதியாக விநியோகிக்க நடவடிக்கை எடுக்கப்பட்டுள்ள நிலையில், இதனை அவதானிக்க கூடியதாக உள்ளது.
அத்துடன், எரிபொருள் நிரப்பும் நிலையங்களில் மட்டுப்படுத்தப்பட்ட பெற்றோல் விநியோகமே இடம்பெறவதாகவும், மகிழூந்துகளுக்கு ஆயிரம் ரூபாவுக்கும், உந்துருளிகளுக்கு 500 ரூபாவுக்கும், பெற்றோல் விநியோகிக்கப்படுகின்றன.
எனினும், எந்தவொரு சந்தர்ப்பத்திலும் மட்டுப்படுத்தப்பட்ட எரிபொருள்களை விநியோகிக்குமாறு எரிபொருள் நிரப்பும் நிலைய உரிமையாளர்களுக்கு ஆலோசனை வழங்கவில்லை என கனிய எண்ணெய் வள அபிவிருத்தி அமைச்சு தெரிவித்துள்ளது.
வாகனங்களுக்கு மாத்திரம் பெற்றோலை விநியோகிக்குமாறு அனைத்து எரிபொருள் நிரப்பு நிலையங்களுக்கும் அமைச்சினால் விசேட சுற்று நிரூபம் அனுப்பி வைக்கப்பட்டுள்ளது.
போத்தல்கள், தகர மற்றும் பிளாஸ்டிக் பேணிகள் உள்ளிட்ட பொருட்களைக் கொண்டு பெற்றோலை கொள்வனவு செய்ய மக்கள் முயற்சிக்கின்றனர்.
இதற்கு தடை விதிக்கும் வகையில் இந்த சுற்றுநிரூபம் வெளியிடப்பட்டுள்ளதாக அவர் குறிப்பிட்டுள்ளார்.
அதேநேரம் பெற்றோலை அதிக விலையில் விற்பனை செய்கின்றவர்களை இனம்காண விசேட பரிசோதனைகள் இடம்பெறுவதாகவும் கனியவள அபிவிருத்தி அமைச்சின் செயலாளர் கூறியுள்ளார்.
எவ்வாறாயினும், பல பிரதேசங்களில் தொடர்ந்தும் போத்தல் மற்றும் தகரப் பேணிகள், பிளாஸ்ரிக் கொள்கலன்களுடன் பொதுமக்கள் நீண்ட வரிசையில் காத்திருக்கின்றன.
உந்துருளி ஓட்டுநர்களும் முச்சக்கரவண்டி சாரதிகளும் இவ்வாறு நீண்ட வரிசையில் காத்திருக்கின்றன.
தங்களுடைய, வாகனங்கள் இடைநடுவே செயலிழந்து போயுள்ளதன் காரணமாக, அவர்கள் அசௌகரியங்களுக்கு முகங்கொடுத்திருப்பதாகவும் தெரிவிக்கப்படுகிறது.
இதேவேளை, நாடளாவிய ரீதியாக ஏற்பட்டுள்ள பெற்றோல் தட்டுப்பாடுடன், பலர் அதிகூடிய விலைக்கு விற்பனை செய்வதாகவும் தகவல்கள் கிடைத்துள்ளன.
எரிபொருள் நிரப்பும் நிலையங்களுக்கு அருகாமையில் சிலர் பெற்றோல் லீற்றர் ஒன்றை 150 முதல் 180 ரூபாய்களுக்கு இடைப்பட்ட விலையில் விற்பனை செய்யப்படுகின்றன.
எவ்வாறாயினும், அதிகூடிய விலைக்கு பெற்றோலை விற்பனை செய்பவர்களை இனம்காண விசேட கண்காணிப்பு பணிகள் முன்னெடுக்கப்படுவதாக கனிய எண்ணெய் வள அபிவிருத்தி அமைச்சின் செயலாளர் உபாலி மாரசிங்க தெரிவித்துள்ளார்.
இதேவேளை, பெற்றோலுக்கு தட்டுப்பாடு ஏற்பட்டுள்ளதன் காரணமாக குத்தகை அடிப்படையில் வாகனங்களை செலுத்துபவர்கள் கட்டணங்களை அதிகரித்துள்ளதாகவும் தகவல்கள் கிடைக்கப்பெற்றுள்ளன.
பெற்றோல் கைவசம் இருப்பதாக அரச அதிகாரிகள் கூறுகின்றபோதிலும், இன்னும் உரிய வகையில் பெற்றோல் கிடைக்கப்பெறவில்லை என பொதுமக்கள் தெரிவித்துள்ளனர்.
சில எரிபொருள் நிரப்பு நிலைய உரிமையாளர்கள், பெற்றோலை தம்வசம் வைத்துக்கொண்டு, அதனை விற்பனை செய்யாதிருப்பதாகவும் அவர்கள் குற்றம் சுமத்தியுள்ளனர்.
இதேவேளை, வட மத்திய மாகாண சபையில் ஒன்றிணைந்த எதிர்க்கட்சியை பிரதிநிதித்துவப்படுத்தும் உறுப்பினர்கள் தள்ளு வண்டியில் இன்று சபைக்கு சென்றுள்ளனர்.
தற்போது நாட்டில் ஏற்பட்டுள்ள பெற்றோல் விநியோகம் தொடர்பான பிரச்சினைக்கு உடன் தீர்வு வழங்ககுமாறு அரசாங்கத்தை வலியுறுத்தும் நோக்கில் அவர்கள் இவ்வாறு செயற்பட்டதாக தெரிவிக்கப்பட்டுள்ளது.
