பாராளுமன்ற உறுப்பினர் சாமர சம்பத் தசநாயக்க மீதான குற்றச்சாட்டுடன் தொடர்புடையதாக தெரிவிக்கப்பட்டு கைது செய்யப்பட்ட மற்றொரு சந்தேக நபருக்கு இன்று (24) பிணை வழங்கப்பட்டுள்ளது.
தற்போதைய பாராளுமன்ற உறுப்பினர் சாமர சம்பத் தசநாயக்க, 2016 ஆம் ஆண்டு ஊவா மாகாண முதலமைச்சராக இருந்த காலத்தில், ஊவா மாகாணத்தில் உள்ள முன்பள்ளி மாணவர்களுக்கு புத்தகப் பைகளை வழங்குவதாகக் கூறி, மூன்று அரசாங்க வங்கிகளிடமிருந்து பணம் கோரியுள்ளார்.
இதன்போது இரண்டு வாங்கிகள் மூலம் தலா 1 மில்லியன் ரூபாவையும், 2.5 மில்லியன் ரூபாவையும் பெற்று அந்தப் பணத்தை அவர் தனது தனிப்பட்ட அறக்கட்டளை கணக்கில் வரவு வைத்ததாக தெரிவிக்கப்படுகிறது.
இருப்பினும், மூன்றாவது வங்கியிடமிருந்து பணம் கோரப்பட்டபோது, வங்கி பணத்தை வழங்க மறுத்ததால், ஊவா மாகாண சபையின் நிலையான வைப்பு கணக்கை சாமர சம்பத் தசநாயக்க அந்த வங்கியிடமிருந்து திரும்பப் பெற்றுள்ளார்.
இதன் மூலம் அரசாங்கத்திற்கு 1.73 மில்லியன் ரூபாய் இழப்பு ஏற்பட்டுள்ளதாக இலஞ்ச ஒழிப்பு ஆணைக்குழு நீதிமன்றத்தில் வழக்கு தொடர்ந்திருந்தது.
அதற்கமைய, தற்போது பிணையில் விடுவிக்கப்பட்டுள்ள பெண் சந்தேகநபர், குறித்த காலப்பகுதியில் ஊவா மாகாண பிரதிச் செயலாளராக (நிதி) கடமையாற்றியுள்ளார்.
இலஞ்ச ஊழல் விசாரணை ஆணைக்குழுவால் கைது செய்யப்பட்ட பிரதிவாதி கொழும்பு மேலதிக நீதவான் ஹர்ஷன கெக்குனாவல முன்னிலையில் ஆஜர்படுத்தப்பட்டபோது இந்த பிணை உத்தரவு வழங்கப்பட்டது.
அதன்படி, சந்தேக நபரை 10 இலட்சம் ரூபா பெறுமதியான இரண்டு சரீரப் பிணைகளில் விடுவிக்க நீதவான் உத்தரவிட்டதோடு, சந்தேக நபருக்கு எதிராக வெளிநாட்டு பயணத்தடை உத்தரவையும் பிறப்பித்தார்.
மாகாண சபையின் நிதி விவகாரங்கள் தொடர்பில் அப்போதைய மாகாண முதலமைச்சர் வழங்கிய அறிவுறுத்தல்களின்படி தனது கட்சிக்காரர் செயல்பட்டதாக சந்தேக நபரின் சட்டத்தரணி நீதிமன்றத்தில் தெரிவித்தார்.
மாகாண சபையின் விதிமுறைகளுக்கு அமைவாகவே தனது கட்சிக்காரர் செயல்பட்டதாகவும், இந்த சம்பவத்தின் முக்கிய சந்தேக நபர் பிணையில் விடுவிக்கப்பட்டு விசாரணை முடிந்துவிட்டதால், தனது கட்சிக்காரரை பிணையில் விடுவிக்குமாறு பிரதிவாதியின் சட்டத்தரணி கோரினார்.
அதன்படி, சந்தேக நபரை பிணையில் விடுவிக்க உத்தரவிட்ட நீதவான், வழக்கை ஜூன் 17 ஆம் திகதி மீண்டும் விசாரணைக்கு எடுத்துக்கொள்ள உத்தரவிட்டார்
