தென் கொரியாவில் வேலை வாய்ப்பு பெற்றுக்கொடுத்தமை தொடர்பில் வாக்குமூலம் வழங்குவதற்காக முன்னாள் அமைச்சர் மனுஷ நாணயக்கார குற்றப்புலனாய்வு திணைக்களத்தில் நாளை செவ்வாய்க்கிழமை (21) ஆஜராகவுள்ளதாக கொழும்பு நீதவான் நீதிமன்றத்திற்கு இன்று திங்கட்கிழமை (20) அறிவிக்கப்பட்டுள்ளது.
தென் கொரிய வேலை வாய்ப்பு சம்பவம் தொடர்பில் கைது செய்யப்படுவதற்கு முன்னர் தன்னை முன்பிணையில் விடுவிக்குமாறு கோரி முன்னாள் அமைச்சர் மனுஷ நாணயக்கார தாக்கல் செய்த முன்பிணை மனு தொடர்பான வழக்கு நீதிமன்றில் இன்றைய தினம் அழைக்கப்பட்ட போது மனுஷ நாணயக்கார சார்பில் ஆஜரான சட்டத்தரணி இந்த அறிவித்தலை நீதிமன்றில் முன்வைத்துள்ளார்.
மேலும், முன்னாள் அமைச்சர் மனுஷ நாணயக்கார குற்றப் புலனாய்வு திணைக்களத்தில் வாக்குமூலம் வழங்கிய பின்னர் இந்த மனு தொடர்பான ஆதாரங்களை உறுதிப்படுத்துவதற்கு அழைக்குமாறும் சட்டத்தரணி நீதிமன்றில் கோரிக்கை விடுத்திருந்தார்.
இதனை கருத்தில் கொண்ட நீதவான் இந்த மனு தொடர்பான ஆதாரங்களை உறுதிப்படுத்துவதற்கு எதிர்வரும் 22 ஆம் திகதி நீதிமன்றத்துக்கு மீண்டும் அழைத்துள்ளார்.
