தவறான நிர்வாகம் உள்ளிட்ட காரணங்களால் சென்னைப் பல்கலைக்கழகம் நிதி நெருக்கடியை எதிர் கொண்டது.
நிதி நெருக்கடியை சமாளிக்கும் வகையில், அடுத்த கல்வியாண்டு முதல் கட்டணத்தை திருத்தம் செய்ய சென்னை பல்கலைக்கழகம் திட்டமிட்டுள்ளது. இருப்பினும், கல்விக் கட்டணம் உயர்த்தப்படாது மற்றும் உயர்வு பெயரளவுக்கு இருக்கும். தற்போது, உயர்த்தப் படக்கூடிய கட்டணங்கள் குறித்து பல்கலைக்கழகம் பரிசீலனை செய்து வருவதாக தகவல்கள் தெரிவிக்கின்றன.
சென்னை பல்கலைக் கழகத்தின் கட்டணம் நாட்டிலேயே மிகக் குறைவு, அதை நாம் உயர்த்த வேண்டும். ஒவ்வொரு முறையும் கட்டணத்தை உயர்த்த திட்டமிட்டால், அதற்கு எதிராக போராட்டங்கள் நடத்தப்படுகின்றன. ஆனால், கட்டணத்தை உயர்த்துவது காலத்தின் தேவை” என்று பல்கலைக்கழகத்தின் மூத்த அதிகாரி ஒருவர் தெரிவித்தார்.
பல்கலைக்கழக துணை வேந்தர் எஸ்.கவுரி கூறும் போது, “கட்டணம் உயர்த்தப்பட்டாலும் அது பெயரளவுக்குத்தான் இருக்கும். மாணவர்கள் எந்த வகையிலும் பாதிக்கப்படாமல் பார்த்துக் கொள்வோம்” என்றார். கல்விக் கட்டணம் மற்றும் தேர்வுக் கட்டணம் மாறாமல் இருக்கும் என்றும் கூறி உள்ளார்.
சமீபத்திய இந்திய தணிக்கை அறிக்கையின்படி, சென்னைப் பல்கலைக்கழகம் தவறான நிர்வாகம் உள்ளிட்ட காரணங்களால் தொடர்ந்து நிதி நெருக்கடியை எதிர் கொண்டது. ஆராய்ச்சி மற்றும் மேம்பாட்டு நடவடிக்கைகளுக்காக ஒதுக்கப்பட்ட நிதி, சம்பளம் மற்றும் வழக்கமான திட்டமில்லா செலவினங்களுக்காக திருப்பி விடப்பட்டதாக கூறியுள்ளது.
பல்கலைக்கழகத்தின் வருமானம் குறைந்துள்ள அதேவேளை செலவுகள் அதிகரித்துள்ளதாக பல்கலைக்கழக வட்டாரங்கள் தெரிவிக்கின்றன. ஆசிரியர் மற்றும் ஆசிரியர் அல்லாத பணியாளர்கள் மற்றும் ஓய்வூதியம் பெறுபவர்களுக்கு ஏழாவது ஊதியக் குழுவின் ஊதிய விகிதங்களை அமல்படுத்திய பிறகு அதிகரித்த நிதிச்சுமை காரணமாக பற்றாக்குறை பெருமளவில் உள்ளது.
