கடந்த 2 ஆண்டுகளாக எடுத்த மருத்துவ ஆய்வில் சென்னையில் 30 சதவீதம் பேருக்கு தைராய்டு நோய் பாதிப்பு இருப்பதாக தெரிவித்துள்ளது.மனிதன் உண்ணும் உணவில் இருந்து ஊட்டச் சத்துக்களையும், உடலுக்கு தேவையான ஆற்றலையும் பெறுவதற்கு தைராய்டு உதவுகின்றன. அந்த சுரப்பிகள் சீராக இருக்கும்வரை உடலில் எந்த பாதிப்பும் ஏற்படாது. அதேவேளையில் அவை சரிவர சுரக்காத பட்சத்தில் பல்வேறு விளைவுகளை ஏற்படுத்தும்.
தைராய்டு மிகக்குறைவாக சுரப்பதால் ஏற்படும் பிரச்சினையை ஹைப்போ தைராய்டு என்றும் தைராய்டு அளவுக்கு அதிகமாக சுரப்பதால் ஏற்படும் பிரச்சினையை ஹைப்பர் தைராய்டு என்றும் மருத்துவர்கள் குறிப்பிடுகிறார்கள்.
இந்தியாவை பொறுத்த வரையில் ஹைப்போ தைராய்டு பிரச்சினைதான் அதிக அளவில் உள்ளது. இந்த பிரச்சினையால் பாதிக்கப்பட்டவர்களுக்கு செரிமானம் சீராக இருக்காது. உடல் சோர்வு மற்றும் எடை அதிகரிப்பு பிரச்சினை ஏற்படக்கூடும்.
பதட்டம், இதயத்துடிப்பில் மாறுபாடு உள்ளிட்டவை அதன் முக்கிய அறி குறிகளாகும். குறிப்பாக பெண்ணுக்கு சீரற்ற மாதவிடாய் மற்றும் கருத்தரித்தலில் பிரச்சினை ஏற்படலாம்.
பொதுவாக தைராய்டு பிரச்சினைகளில் ஆண்களைவிட பெண்களே அதிக அளவில் பாதிக்கப்படுகின்றனர். உலக அளவில் 8 பெண்களில் ஒருவருக்கு தைராய்டு பிரச்சினை இருப்பதாக ஆய்வு முடிவுகள் தெரிவிக்கின்றன. இந்தியாவை பொறுத்தவரை தைராய்டு பிரச்சினை இருப்பது தெரியாமலே 20 சதவீத பெண்கள் இருப்பதாகவும் தகவல்கள் தெரிவிக்கின்றன.
இந்த நிலையில் மெட்ரோ பாலிஸ்லிஸ்டர் என்ற ஆய்வகம் கடந்த 2 ஆண்டுகளாக எடுத்த மருத்துவ ஆய்வில் சென்னையில் தைராய்டு பாதிப்பு அதிகமாக இருப்பதாக தெரிவித்துள்ளது.
1.59 லட்சம் பேரிடம் மேற்கொள்ளப்பட்ட மருத்துவ பரிசோதனையில் 26.4 சதவீதம் பேருக்கு ஹைப்போ தைராய்டு இருப்பது உறுதி செய்யப்பட்டுள்ளது. 3.5 சதவீதம் பேருக்கு ஹைப்பர் தைராய்டு இருப்பது அதன் மூலம் தெரிய வந்துள்ளது.
80 வயது கடந்த முதியவர்களே அதிக அளவில் பாதிக்கப்பட்டுள்ளனர். 34 சதவீத முதியோர் தைராய்டு பிரச்சினைகளுடன் வாழ்ந்து வருகின்றனர். இதில் 10 வயது முதல் 20 வயது வரை உள்ளவர்களில் 21 சதவீதம் பேருக்கு தைராய்டு பாதிப்பு இருப்பது அதிர்ச்சியை ஏற்படுத்தி உள்ளது.
இதுகுறித்து மெட்ரோ பாலிஸ் ஆய்வக துணை தலைவர் டாக்டர் அனிதா சூர்ய நாராயணா கூறியதாவது:-
தைராய்டு சுரப்பிகள் சீராக இல்லாமல் இருப்பதற்கு பல்வேறு காரணங்கள் உள்ளன. உணவில் அயோடின் குறைபாடு, கர்ப்பப்பை நீர்கட்டிகள், ஊட்டச்சத்து குறைபாடு உள்ளிட்ட பல காரணங்கள் உள்ளன. வாழ்க்கை முறை மாற்றங்கள் கூட ஏதோ ஒரு வகையில் தைராய்டு சார்ந்த பிரச்சினைகளுக்கு காரணமாக அமைகின்றன.
இதற்கு உரிய விழிப்புணர்வு இல்லாததே காரணம். உடலில் ஏதேனும் மாற்றம் ஏற்பட்டால் அதனை அலட்சியப்படுத்தாமல் உடனடியாக மருத்துவ பரிசோதனைகளை மேற்கொண்டால் இத்தகைய பாதிப்புகளை முதலில் கண்டறிந்து சிகிச்சை பெறலாம்.
இவ்வாறு அவர் கூறினார்.
