பெருந்தோட்ட மற்றும் சமூக உட்கட்டமைப்பு வசதிகள் அமைச்சின் கீழ் செயல்படும் நிறுவனங்களின் சொத்துகள் மற்றும் குறைப்பயன்பாட்டுக் காணிகளை பொருத்தமான முதலீட்டாளர்களுக்கு வழங்க நடவடிக்கைகள் முன்னெடுக்கப்பட்டு வருகின்றது.
இது தொடர்பாக, 2025.06.02 அன்று இடம்பெற்ற அமைச்சரவைக் கூட்டத்தில் அங்கீகாரம் வழங்கப்பட்டுள்ளதாக தெரிவிக்கப்படுகிறது. அந்த அங்கீகாரத்தின் பிரகாரம், முதலீட்டாளர்களுக்கு குறைப்பயன்பாட்டுக் காணிகள் மற்றும் சொத்துகளை சரியான முறையில் ஒப்படைப்பதற்கான நடவடிக்கைகள் தற்போது மேற்கொள்ளப்பட்டு வருகின்றன.
அதில் முதலாம் கட்டத்தில் உள்வாங்கப்படாத சொத்துகள் மற்றும் காணிகள், அந்தந்த நிறுவனங்களின் கீழ் தொடர்ந்தும் கண்டறியப்படுகின்றது.
முதன்மை சொத்துகள் மற்றும் காணிகள்:
* இரண்டாம் கட்டத்தில் அடையாளங் காணப்பட்ட இலங்கை அரச பெருந்தோட்டக் கூட்டுத்தாபனம், மக்கள் தோட்ட அபிவிருத்திச் சபை மற்றும் எல்கடுவ பெருந்தோட்டக் கம்பனிக்கு சொந்தமான குறைப்பயன்பாட்டுக் காணிகள் மற்றும் சொத்துகள்.
* தேயிலைச் சக்தி நிதியத்திற்குச் சொந்தமான மாத்தறை மாவட்டத்தில் உள்ள 40.48 ஹெக்டேயர் மாவரல தோட்டக் காணி மற்றும் தேயிலைத் தொழிற்சாலை.
* இலங்கை மரமுந்திரிகை கூட்டுத்தாபனம் பயன்படுத்தி வருகின்ற கொண்டச்சி தோட்டத்தின் 1,541 ஹெக்டேயர் குறைப்பயன்பாட்டுக் காணி.
2026 ஜனவரி 12 அன்று நடைபெற்ற அமைச்சரவைக் கூட்டத்தில், மேற்கண்ட குறைப்பயன்பாட்டுக் காணிகள் மற்றும் சொத்துகளை சரியான பெறுகை முறையுடன், குத்தகை அடிப்படையில் முதலீட்டாளர்களுக்கு வழங்க நடவடிக்கைகள் மேற்கொள்ளப்படுவதாக முடிவு செய்யப்பட்டுள்ளது.
அதற்கமைய, மேற்குறிப்பிட்ட குறைப்பயன்பாட்டுக் காணிகள், சொத்துக்களுக்குப் பொருத்தமான முதலீட்டாளர்களுக்கு சரியான பெறுகை முறையைக் கடைப்பிடித்து குத்தகை அடிப்படையில் வழங்குவதற்காக பெருந்தோட்ட மற்றும் சமூக உட்கட்டமைப்பு வசதிகள் அமைச்சர் சமர்ப்பித்துள்ள யோசனைக்கு அமைச்சரவை அங்கீகாரம் வழங்கியுள்ளது.
