இத்தாலியின் வெளிவிவகார மற்றும் சர்வதேச ஒத்துழைப்புக்கான பிரதி அமைச்சர் மரியா திரிபோடி இன்று புதன்கிழமை (03) மாலை இலங்கைக்கு உத்தியோகபூர்வ விஜயம் மேற்கொண்டுள்ளார்.
இத்தாலியின் பிரதி அமைச்சர் மரியா திரிபோடி செப்டம்பர் மாதம் 5 ஆம் திகதி வரை இலங்கையில் தங்கியிருக்கவுள்ளதாக வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சு தெரிவித்துள்ளது.
சுமார் ஒரு தசாப்த காலத்திற்கு பின்னர் இத்தாலியிலிருந்து இலங்கைக்கு மேற்கொள்ளப்படும் மிக உயர்ந்த மட்ட விஜயமாக இந்த விஜயம் கருதப்படுகிறது.
இந்த விஜயத்தின் போது, இலங்கை – இத்தாலி அரசியல் ஆலோசனைகளின் ஆரம்ப அமர்விற்கு வெளிவிவகார மற்றும் வெளிநாட்டு வேலைவாய்ப்பு பிரதி அமைச்சர் அருண் ஹேமச்சந்திரவுடன் இணைந்து இத்தாலிய பிரதி அமைச்சர் திரிபோடி தலைமை தாங்குவார்.
இந்த விஜயத்தின் போது அரசியல் ஆலோசனை பொறிமுறையை நிறுவுவது குறித்த புரிந்துணர்வு ஒப்பந்தம் கையெழுத்திடப்பட உள்ளது, இது இரு நாடுகளுக்கும் இடையிலான கலந்துரையாடலுக்கான கட்டமைக்கப்பட்ட கட்டமைப்பை வழங்குகிறது.
பிரதமர் ஹரிணி அமரசூரியவை சந்தித்து வெளிவிவகார, வெளிநாட்டு வேலைவாய்ப்பு மற்றும் சுற்றுலா அமைச்சர் விஜித ஹேரத்துடன் கலந்துரையாடல்களை நடத்தவும் பிரதி அமைச்சர் திரிபோடி திட்டமிட்டுள்ளார்.
இரு நாடுகளுக்கும் இடையிலான இராஜதந்திர உறவுகள் 1952 இல் நிறுவப்பட்டன என அந்த அறிக்கையில் மேலும் தெரிவிக்கப்பட்டுள்ளது.
