Year: 2017

கொஸ்கொடை பிரதேசத்தில் இடம்பெற்ற 3 துப்பாக்கி பிரயோ கத்தில் 4 பேர் உயிரிழந்துள்ளனர். இன்று அதிகாலை இவ்வாறு துப்பாக்கி பிரயோகங்கள் மேற்கொள்ளப்பட்டுள்ளதாக காவற்துறை தெரிவித்துள்ளது. எக் காரணத்திற்காக இவ்வாறு துப்பாக்கி பிரயோகம் மேற்கொள்ளப்பட்டுள்ளது குறித்து இது வரையில் அறியப்படவில்லை. இதன்போது 15 வயதுடைய பாடசாலை மாணவர் ஒருவர் காயமடைந்து மருத்துவமனையில் அனுமதிக்கப்பட்டுள்ளார்.

கேட்டலோனியா, ஸ்பெயினுக்கு சொந்தமான ஒரு பகுதி என்பதே தமது நிலைப்பாடு என இலங்கை அறிவித்துள்ளது. கேட்டலோனிய பிராந்திய சட்டமன்ற சுயாட்சி தொடர்பில் இலங்கை வெளிவிவகார அமைச்சு வெளியிட்டுள்ள அறிக்கையில் இந்த விடயம் குறிப்பிடப்பட்டுள்ளது. ஸ்பெயினின் இறையாண்மை மற்றும் ஒருமைப்பாட்டிற்கு இலங்கை முழு ஆதரவையும் வழங்குவதாக அந்த அறிக்கையில் தெரிவிக்கப்பட்டுள்ளது. ஸ்பெயினுக்கும் இலங்கைக்கும் நீண்ட காலமாக சிறந்த இராஜதந்திர உறவு நிலவுவதாக சுட்டிக்காட்டியுள்ள வெளிவிவகார அமைச்சு, ஐரோப்பிய ஒன்றியத்தின் ஒரு முக்கிய உறுப்பு நாடாக ஸ்பெயின் விளங்குவதாகவும் தெரிவித்துள்ளது.

சிலாபம், மாதம்பை பகுதியில் பாடசாலை மாணவர்களுக்கு போதை மாத்திரைகளை விற்பனை செய்துவந்த பெண் ஒருவரை பொலிஸார் கைது செய்துள்ளனர். கிடைத்த தகவலுக்கு அமைய முச்சக்கரவண்டியொன்றை சோதனைக்கு உட்படுத்திய பொலிஸார் 30 வயதான பெண் ஒருவரையும் முச்சக்கரவண்டி சாரதியையும் கைது செய்துள்ளனர். இதன்போது குறித்த பெண்ணிடமிருந்து 10 இலட்சம் ரூபா பெறுமதியான போதை மாத்திரைகள் பறிமுதல் செய்யப்பட்டுள்ளன. இந்த பெண் வழங்கிய தகவலுக்கமைய, இன்று இரண்டாவது சுற்றிவளைப்பை பொலிஸார் மேற்கொண்டனர். அவர் தற்காலிகமாக வசித்துவந்த மாதம்பேயிலுள்ள வீட்டில் மறைத்து

வடக்கு கிழக்கு இணைப்பிற்கு எதிர்ப்பு தெரிவித்து திருகோணமலையில் இன்று ஆர்ப்பாட்டம் இடம்பெற்றது. திருகோணமலை மணிக்கூட்டு கோபுரத்திற்கு அருகில் இந்த ஆர்ப்பாட்டம் முன்னெடுக்கப்பட்டது. கிழக்கு மக்கள் அமைப்பினால் இந்த ஆர்ப்பாட்டம் ஏற்பாடு செய்யப்பட்டிருந்தது.  

சைட்டம் விவகாரத்திற்கு முடிவு இல்லையெனில் நாளை முதல் சாகும் வரையிலான உணவுதவிர்ப்பு போராட்டம் ஒன்றை மேற்கொள்வதாக அரச பல்கலைக்கழக மருத்துவ பீட மாணவர்களின் பெற்றோர்கள் சங்கம் தெரிவித்துள்ளது. கொழும்பில் இன்று இடம்பெற்ற ஊடக சந்திப்பில் அவர்கள் இதனை தெரிவித்தனர். சைட்டம் நிறுவனத்தை, மாலபே ஸ்ரீலங்கா தகவல் தொழிநுட்ப நிறுவனத்திடம் ஒப்படைப்பதற்கான யோசனையொன்று அரசாங்கத்திடம் முன்வைக்கப்பட்டுள்ளதாக தகவல் வெளியாகியுள்ளது. சைட்டம் நிறுவனத்தை ஸ்ரீலங்கா தகவல் தொழிநுட்ப பிரிவில் இணைத்து அதன் ஒரு பீடமாக மாற்றுவதற்கான நடவடிக்கைகள் மேற்கொள்ளப்படுவதாக தெரிவிக்கப்படுகின்றது.

ஹல்துமுல்ல, கொஸ்லந்த பிரதேசத்திற்கு கடந்த 6 மணித்தியாலத்துக்குள் பெய்த 125 மி.மி. மழை வீழ்ச்சியினால் மண்சரிவு அபாயம் ஏற்பட்டுள்ளதாக அனர்த்த முகாமைத்துவ மத்திய நிலையம் அறிவித்துள்ளது. இதனால், அப்பிரதேசத்திலுள்ள ஆறு குடும்பங்களைச் சேர்ந்தவர்கள் பாதுகாப்பான இடங்களுக்கு மாற்றப்பட்டுள்ளதாகவும் நிலையம் மேலும் கூறியுள்ளது. இந்த அடை மழையினால் அப்பிரதேசங்களின் சுவர்களில் வெடிப்புகள் ஏற்பட்டுள்ளதாகவும், சில இடங்களில் குழிகள் ஏற்பட்டுள்ளதாகவும் அப்பிரதேச செயலாளர் சுனில் அபேகோன் தெரிவித்துள்ளார்.